Tað er sjáldsamt at fáa eina slíka heildaruppliving, sum hesa vit fingu á túrinum við MARKA. Tað er einki minni enn ein fantastisk uppliving at vera tikin úr rokaliga gerandisdegnum og sett út í náttúruna, har tíðin og ferðin er sín egna. Har flyta vit okkum ikki skjótari, enn jørðildi og egna gongu megin (orkan) loyvir tí. Náttúran ræður og vit geva eftir.

Í allarbesta veðri vóru vit ein sera gevandi túr við MARKA. At fáa so nógva sansastimbran undir bláum himli er einki minni enn heilt framúr. Ja, av sonnum ,,gakk, lær og spæl´´ við søgum og sagnum undir opnum himli – takk fyri túrin, sum vit viðmæla øðrum. Við takkarkvøðu Spírarnir á Dagstovninum á Hamrinum.

Ein góðveðursdag í juni skiftu vit skógvarnar út við fjallastivlar og fóru ein starvsfólkatúr við Marka niðan á Stall. Við í ryggsekkin høvdu vit fingið kaffi og hvør sín matpakka, so vit vóru væl útgjørd at fara túrin. Ferðaleiðarin dugdi avbera væl at steðga á við jøvnum millumbili, at greiða frá og at fáa okkum við fleiri hundrað ár aftur í tíð. Á veg niðan tóku vit ein steðg, har vit drukku kaffi og fingu okkurt søtt afturvið. Útsýnið var frálíkt á veg niðan á Stall, og niðaná komin var útsýnið ikki verri; tað var vakurt, óansæð hvønn veg vit vendu. Á veg oman aftur settust vit við Skeiðsá at fáa okkum heimabakað breyð við føroyskum viðskera. Tað var serstakt at njóta henda góða bitan og felagsskapin í friðsæla umhvørvinum, har einans áartutl og fuglaljóð hoyrdust. Ein sera væl eydnaður túrur var komin at enda, og vit kunnu avgjørt viðmæla at fara frálíka túrin niðan á Stall við Marka.

Ein heilt fantastiskur gongutúrur í fínasta veðri, og ikki minni fantastiskt útsýni – eisini sjálvt um mjørkin argaði eitt sindur tá vit vóru hægst uppi. Tað var lætt at ganga allan vegin og longdin á túrinum var eisini passaligur, so øll kundu verða við. Margrit var nærverandi, og dugdi ótrúliga væl at greiða frá søgunum á teimum ymisku støðunum. Tá vit skuldu eta tann lekkrasta matpakkan, settu vit okkum tætt við eina á í einum dali, og har var ein friður, sum man ikki upplivur til dagligt í Havn J Av tí at vit vóru so nógvar, so var tað gott at Maria kundi ganga aftast og syrja fyri at allar vóru við.

Vit vóru ein sera góðan og hugnaligan túr við Marka í allar besta veðrið í summar. Tað var áhugavert at lurta eftir ferðaleiðarinum, sum dugdi væl at siga frá um seyðahald, marking av seyði, tíðina áðrenn oyggjarvegin og Oyrareingjagarðin. Eisini má matpakkin frá teimum nevnast, hann var sera leskiligur og eitt hitt herfrá J Túrurin var lættur og væl egnaður fyri fólk í øllum aldri. Alt í alt, eitt gott væl til eina starvsfólkaútferð, sum heilt vist kann viðmælast.